അദ്ദിക്ർ

ത്രികാലജ്ഞാനിയായ നാഥന്‍ ഓരോരുത്തരെയും സൃഷ്ടിക്കുന്നതിന് മുമ്പുതന്നെ അവരുടെ ഭക്ഷണവിഭവങ്ങളും ആയുസ്സുമെല്ലാം നിശ്ചയിച്ച് ഓരോരുത്തരുടെയും പിരടിയില്‍ ബന്ധിച്ചിട്ടുള്ള കര്‍മ്മരേഖയില്‍ രേഖപ്പെടുത്തിയിട്ടുണ്ട്. 11: 6 ല്‍, ഭൂമിയില്‍ ഒരു ജീവജാലത്തിനും അതിന്‍റെ ഭക്ഷണം അല്ലാഹുവിന്‍റെ പക്കലായിട്ടല്ലാതെയില്ല എന്നും അതിന്‍റെ വിശ്രമസ്ഥലവും അതിന്‍റെ മരണത്തിനുശേഷമുള്ള സൂക്ഷിപ്പുസ്ഥലവുമെല്ലാം ഒരു വ്യക്തമായ ഗ്രന്ഥത്തില്‍ രേഖപ്പെടുത്തിയിട്ടുണ്ട് എന്നും പറഞ്ഞിട്ടുണ്ട്. 29: 60 ല്‍, എത്രയെത്ര ജീവജാലങ്ങളാണുള്ളത്, അവയുടെ ഭക്ഷണം അവ വഹിച്ച് നടക്കുന്നില്ല; അവയെയും നിങ്ങളെയും അല്ലാഹുവാണ് ഊട്ടുന്നത്, അവന്‍ എല്ലാം കേള്‍ക്കുന്നവനും അറിയുന്നവനുമാണ് എന്ന് പറഞ്ഞിട്ടുണ്ട്. അവര്‍ എപ്പോഴാണ് എവിടെയാണ് മരിക്കുക എന്നും അവരുടെ ശരീരം മണ്ണില്‍ എത്ര ലയിച്ചുചേരുമെന്നും ഒരു ഗ്രന്ഥത്തില്‍ രേഖപ്പെടുത്തി സൂക്ഷിച്ചിട്ടുണ്ടെന്ന് 50: 4 ല്‍ പറഞ്ഞിട്ടുണ്ട്. സര്‍വ്വസ്രഷ്ടാവായ അല്ലാഹു ആരുടെയും ആശ്രയം വേണ്ടാത്തവനാണെന്നും സൃഷ്ടികളെല്ലാം അല്ലാഹുവിന്‍റെ ആശ്രയം ആവശ്യമുള്ളവരാണെന്നുമുള്ള വിശ്വാസത്തില്‍ ജീവിക്കുന്നവരാണ് വിശ്വാസികള്‍. അവരാണ് 112: 2 ല്‍ പറഞ്ഞ സ്വമദ് എന്ന അല്ലാഹുവിന്‍റെ ഗുണനാമത്തെ അംഗീകരിക്കുന്നവര്‍. അവര്‍ തന്നെയാണ് അല്ലാഹുവിന്‍റെ നിഷ്കളങ്കരായ അടിമകളും. 4: 20, 32-33; 6: 59 വിശദീകരണം നോക്കുക.